كتبت د. ايمي حسين ….اخطار التعلق وكيفيه التحرر من التعلق وما هو؟

هو عملية مهمة جداً عشان تقدرى تطهرى قلبك وتعيش حياة أفضل،

فهو خطوة كبيرة ومهمه جدا لتحقيق السلام الداخلي والحرية النفسية.

من أخطار التعلق أنه بيسحب منك طاقتك وبيخليكي دايمًا مش مرتاحة،
وقت لبتكوني مرتبطه بشخص بشكل مفرط او شئ، لدرجه ان ده بيأثر علي راحتك النفسية والعاطفية وبيخليكي مش قادرة تعيشي بحرية، هنا بتكوني في مرحلة خطر لانك عايشه من منطلق التعلق(الاحتياج).

التحرر هنا مش معناه إنك تتجاهلي الأشخاص أو الأمور المهمة في حياتك، لكن المقصود هو إنك تكوني قادرة على التعامل مع كل حاجة بحكمة ومن غير ما يتملكك شعور التعلق المفرط أو الخوف من فقدان شيء.

لو عايزة تبتدي رحلة التحرر دي، في (6) خطوات فعّالة هقولك عليها و تقدري تطبقيها
فرقت معايا جداااا وحققتلي الاتزان النفسي:

أولا ….ملاحظة المشاعر:
أول خطوة هي إنك تبدئي تلاحظي المشاعر اللي بتجيلك لما تحسي إنك متعلقة بشيء أو شخص.
اعترفي لنفسك بالمشاعر دي وابدأي حسيها وفكرى فيها. الفكرة هنا إنك تقدرى تفرقي بين حبك لشخص وأحتياجك المفرط ليه.

ثانيا….. اتعلمي تعيشي لنفسك:
فكري في أوقات كنتي بتحسّي فيها بالسعادة قبل ما تتعلقي بحاجة،مش لازم كل حياتك تكون مرتبطة بشخص أو شيء معين، ولو عندك شغف أو هواية، استثمري فيها أكتر.
لما تكوني مشغولة بحاجات بتحبيها، ده هيساعدك تكوني أقل تعلقًا.

ثالثا…. حددي حدودك:
في بعض الأوقات بنبقَى خايفين نفقد ناس أو حاجات لدرجة إننا بنفني حياتنا عشانهم، جربي تحددي حدود لنفسك في التعامل مع الآخرين، سواء في العلاقات أو في الأشياء اللي بتحتاجيها عاطفيًا، ابدأي بخطوات بسيطة، زي إنك تقضي وقت مع نفسك أكتر.

رابعا ….التخلي التدريجي:
لو كنتي متعلقة بشخص أو شيء لدرجة إنه بيسيطر على حياتك، حاولي تبعدي عنهم بشكل تدريجي.
مثلاً، لو كنتي معتادة إنك دايمًا تكوني في تواصل مع شخص معين، جربي تبطلي التواصل أو تقلليه بشكل تدريجي،ده هيساعدك تكسري التعلق وتتعلمي تعيشي من غير ما تكوني معتمدة على حاجة واحدة.

خامسآ…. ركزي على اللحظة الحالية:
فكري دايمًا في اللحظة اللي انتي عايشاها الان، من غير ما تشيلي هم المستقبل أو تفكري في الماضي، لما تركزي على الوقت ده، هتحسي إنك أكثر حرية وتقدري تتعاملي مع حياتك بشكل أريح.

سادسآ ….التسامح مع نفسك:
لازم تعرفي إن التحرر مش هيتحقق في يوم وليلة، ولازم تكوني رحيمة بنفسك لو لقيتي نفسك لسه متعلقة بشيء ما،اعرفي ان التغيير بياخد وقت، والمهم هو إنك تحاولي وتبذلي جهدك.

الهدف من التحرر هو إنك تعيشي حياة متزنة.
وانك تعرفي تاخدى قرارات حكيمه، من غير خوف ولا قلق وأنك تعرفي تتشافي من اى علاقة سامه او بتستنذف طاقتك.

👌لما تبدأي تطبقي الخطوات دي، هتلاقي نفسك تدريجيًا بتتحرري من التعلق وتقدري تكملي حياتك بشكل أفضل.

انوى التحرر وطهرى قلبك،وتذكرى ان
التغير بيبدء من القلب.